ஆண்டுக்கு ஒருமுறை வரவிருக்கும் பண்டிகை நாளான தீபாவளி, பொங்கல் நாட்களில் குடும்பத்தோடு மகிழ்ச்சியாக இருப்பதை தாண்டி பொழுதுபோக்கிற்க்காக திரைப்படங்கள் பார்ப்பது வழக்கம். அந்த வகையில் புதுப்படங்கள் ரிலீஸ் ஆனால் தியேட்டர் சென்று பார்த்துகொண்டாடி வருகிறோம்.
விஜய், அஜித், கமல், ரஜினி, சூர்யா, விக்ரம் என டாப் ஹீரோக்களின் படங்கள் இல்லாமல் இந்த ஆண்டு வளர்ந்து வரும் முன்னணி ஹீரோக்களின் படங்கள் வெளியாகவுள்ளன.
கடந்த சில ஆண்டுகளாக தமிழ் சினிமாவில் உச்ச நட்சத்திரமாக இருந்து வரும் சிவகார்த்திகேயன் நடிப்பில் அமரன் படமும், ஜெயம் ரவியின் பிரதர் படம், விஜய் டிவி நட்சத்திரமான கவின் நடித்த பிளெடி பெக்கர் படம், மலையாள ஸ்டார் ஹீரோவான துல்கர் சல்மான் நடித்த லக்கி பாஸ்கர் ஆகிய படங்கள் இந்த ஆண்டு தீபாவளிக்கு வரவுள்ள படங்கள்.
சிவகார்த்திகேயன் – அமரன்:
சின்னத்திரையில் இருந்து வெள்ளித்திரை வந்து தனது காமெடியால் தனக்கான இடத்தை குறுகிய காலத்தில் பிடித்த சிவகார்த்திகேயன் நடித்த ஆக்சன் படமான அமரன் திரைப்படம் தீபாவளி ரிலீஸுக்கு (அக்டோபர் 31) காத்துக்கொண்டுள்ளது.
150 கோடிக்கு மேல் செலவிடப்பட்ட இந்த படத்தை ராஜ்குமார் பெரியசாமி இயக்க, கமல்ஹாசன் சொந்த தயாரிப்பு நிறுவனமான ராஜ்கமல் பிலிம்ஸ் நிறுவனம் தயாரித்துள்ளது.
சிவகார்த்திகேயனுக்கு ஜோடியாக சாய் பல்லவி நடித்துள்ளார். படத்திற்கு GV. பிரகாஷ் குமார் இசையமைக்க, ராகுல் போஸ், பூவன் அரோரா, ஸ்ரீ குமார், ஷியாம் மோகன் ஆகியோரும் நடித்துள்ளனர். மறைந்த ராணுவ வீரர் முகுந்த் வரதராஜன் வாழ்க்கை வரலாறை மையமாக கொண்டு எடுக்கப்பட்டது.
தமிழில் கடைசியாக சாய் பல்லவி நடித்த கார்கி படம் 2022 -ல் வெளியான நிலையில் தற்போது 2 ஆண்டுகள் கழித்து அமரன் படத்தில் நடிக்கவுள்ளார். இந்த ஆண்டு சிவகார்த்திகேயன் நடிப்பில் வெளியான அயலான் படம் சரியான வரவேற்பை பெறவில்லை.
மேலும் விஜய் நடிப்பில் வெளியான GOAT படத்தில் கேமியோ ரோலில் நடித்திருந்தார். அமரன் படம் சிவகார்த்திகேயனுக்கு எந்த அளவிற்கு கைகொடுக்கும் என தீபாவளி வரை பொறுத்திருந்து பார்க்கலாம்.
ஜெயம் ரவி – பிரதர்:
ஜெயம் ரவி நடித்த பிரதர் படம் சில மாதங்களுக்கு முன்பே இந்த ஆண்டு தீபாவளிக்கு திரைக்கு வரம் என உறுதி செய்த நிலையில் அமரன் படத்திற்கு போட்டியாக வெளியாகவுள்ளது. படத்தை M. ராஜேஷ் இயக்க, ஹாரிஸ் ஜெயராஜ் இசையமைக்கவுள்ளார்.
ஜெயம் ரவி, பிரியங்கா மோகன், சரண்யா பொன்வண்ணன், நட்டி நட்ராஜ், பூமிகா, VTV. கணேஷ், ரோபோ சங்கர், சீதா என பல முன்னணி நடிகர்கள் நடித்துள்ளனர். அக்டோபர் 31-ம் தேதி ரிலீஸ் ஆக உள்ள இந்த படத்தை ஸ்கிரீன் சீன் மீடியா எண்டர்டெயின்மென்ட் நிறுவனம் தயாரிக்கவுள்ளது.
சிவா மனசுல சக்தி, பாஸ் என்கிற பாஸ்கரன், ஒரு கல் ஒரு கண்ணாடி போன்ற படங்களுக்கு பிறகு M. ராஜேஷ் எடுத்த படங்கள் சரியான வரவேற்பை பெற தவறிய நிலையில் பிரதர் படம் எந்த அளவு வெற்றியை தரும் என பார்க்கலாம்.
கவின் – பிளெடி பெக்கர்:
விஜய் டிவி நட்சத்திரமான கவின் நடிப்பில் தீபாவளி (அக்டோபர் 31) நாளில் வெளியாகவுள்ள திரைப்படம் பிளெடி பெக்கர். அறிமுக இயக்குனர் சிவபாலன் இயக்க, இயக்குனர் நெல்சன் தயாரிக்கவுள்ளார். நெல்சன் தயாரிக்கும் முதல் படம் இது. கவின் பிச்சைக்காரனாக நடித்திருக்கும்படி போஸ்டர் வெளியாகியுள்ளது.
ரெடின் கிங்ஸ்லி, விஷவ்ராஜ் போன்றோரும் நடித்துள்ளனர். படத்தின் அப்டேட் அவ்வப்போது வெளியாகி வருகிறது.
துல்கர் சல்மான் – லக்கி பாஸ்கர்:
மலையாள ஸ்டார் ஹீரோவான துல்கர் சல்மான் நடிப்பில் பான் இந்தியா படமாக தீபாவளி அன்று வெளியாகும் படம் லக்கி பாஸ்கர். வெங்கி அட்லூரி இயக்க, GV. பிரகாஷ் குமார் இசையமைத்துள்ளார். தனுஷ் நடிப்பில் வெளியான வாத்தி படத்தை இயக்கியவர் வெங்கி அட்லூரி.
சித்தாரா நிறுவனம் தயாரிக்க துல்கர் சல்மான், மீனாட்சி செளத்ரி, ரித்திக், சூர்யா ஸ்ரீனிவாஸ் ஆகியோர் நடித்துள்ளார். படத்தின் முதல் பாடலான “கொல்லாதே” வெளியாகி வரவேற்பை பெற்றது.
